कोल्हापूरच्या शिक्षण अधिकाऱ्याला लाच घेताना रंगेहाथ अटक
कोल्हापूर महापालिकेच्या प्राथमिक शिक्षण समितीचे प्रभारी शिक्षणाधिकारी डी. सी. कुंभार यांना लाचलुचपत प्रतिबंधक विभागाच्या (ACB) पथकाने लाच घेताना रंगेहाथ अटक केली. ही कारवाई सोमवारी सायंकाळी शिक्षण समितीच्या कार्यालयाबाहेरच करण्यात आली.
एका शिक्षकाने दिलेल्या तक्रारीवरून हा सापळा रचण्यात आला होता. जिल्हा बदलीहून आलेल्या शिक्षकाला कोल्हापूर महापालिका शाळेत नियुक्ती देण्यासाठी कुंभार यांनी लाच मागितली होती. लाच घेताना त्यांना पोलिसांनी ताब्यात घेतले.
कुंभार हे मूळचे जिल्हा परिषदेतील माध्यमिक शिक्षण विभागात विस्तार अधिकारी असून, त्यांच्याकडे महापालिकेच्या प्राथमिक शिक्षण समितीचा प्रशासनाधिकारी म्हणून प्रभारी कार्यभार होता. त्यांच्यावर लाचलुचपत प्रतिबंधक विभागाने गुन्हा दाखल केला आहे.