कॉक्रोच जनता पार्टीला महाराष्ट्र बहुजन आघाडीचा जाहीर पाठिंबा; कोल्हापुरात घोषणा
कोल्हापूर : देशात वाढत असलेल्या भ्रष्टाचार, अन्याय आणि संविधानविरोधी कारभाराविरोधात आवाज उठवणाऱ्या ‘कॉक्रोच जनता पार्टी’ला महाराष्ट्र बहुजन आघाडीने जाहीर पाठिंबा दिला आहे. याबाबतची माहिती आघाडीच्या पदाधिकाऱ्यांनी पत्रकार परिषदेत दिली.
यावेळी बोलताना पदाधिकाऱ्यांनी सांगितले की, सामाजिक चळवळींमध्ये तरुणांचा सहभाग कमी असल्याची टीका सातत्याने केली जात होती. अनेक तरुणांना ‘कॉक्रोच’ म्हणून हिणवण्यात आले, त्यांचा अपमान करण्यात आला. अशा परिस्थितीत अभिजीत दिपके या तरुणाने पुढे येत ऑनलाईन माध्यमातून ‘कॉक्रोच जनता पार्टी’ची स्थापना केली. देशभरातील जवळपास २० मिलियन तरुणांनी या चळवळीला पाठिंबा दिला असून, हा भारतीय राजकारणातील एक वेगळा आणि ऐतिहासिक प्रयोग असल्याचे त्यांनी सांगितले.
या प्रमुख मुद्द्यांवरून दिला पाठिंबा:
- देशातील विविध विभागांमध्ये वाढलेला भ्रष्टाचार.
- संविधानाच्या अपेक्षेप्रमाणे कारभार न होणे.
- निवृत्त न्यायाधीशांना राज्यसभेवर पाठविण्यासारख्या घडामोडींविरोधात आवाज.
सामान्य तरुणांच्या भावना आणि प्रश्न मांडणाऱ्या या चळवळीला महाराष्ट्र बहुजन आघाडीचा पूर्ण पाठिंबा असल्याचेही त्यांनी जाहीर केले.