ग्रामपंचायत पोटनिवडणुकीत आमदार सतेज पाटील गटाचा कोल्हापूर दक्षिणमध्ये झेंडा!
१३ पैकी १० ग्रामपंचायतींवर दणदणीत विजय
कोल्हापूर दक्षिणमध्ये पाटील गटाचे वर्चस्व कायम
कोल्हापूर दक्षिण विधानसभा मतदारसंघातील ग्रामपंचायत पोटनिवडणुकीत विधानपरिषदेतील कॉंग्रेसचे गटनेते आमदार सतेज पाटील यांच्या गटाने दमदार कामगिरी करत राजकीय वर्चस्व कायम राखले. १३ जागांपैकी तब्बल १० ठिकाणी त्यांच्या गटाचे उमेदवार विजयी झाल्याने पाटील गटाची ताकद पुन्हा अधोरेखित झाली.
करवीर तालुक्यातील तेरा गावांमध्ये झालेल्या या पोटनिवडणुकीचा निकाल आज जाहीर झाला. हणबरवाडी येथे सरपंचपदासाठी झालेल्या थेट निवडणुकीत बाबुराव वाडकर यांनी विजय मिळवत पाटील गटाची बाजू भक्कम ठेवली. विशेष म्हणजे, यापूर्वी माजी सरपंच कुमार कोराणे यांच्यावर अविश्वास ठराव झाल्यानंतरही पुन्हा पाटील गटालाच यश मिळाले.
निकाल स्पष्ट: सतेज पाटील व ऋतुराज पाटील यांची पकड कायम!
विरोधी गटाच्या उमेदवारांनी फक्त तीन ठिकाणी बाजी मारली आहे. एकूण चित्र पाहता कोल्हापूर दक्षिणमध्ये आमदार सतेज पाटील आणि माजी आमदार ऋतुराज पाटील यांची पकड कायम असल्याचे या निकालातून स्पष्ट झाले.विजयी उमेदवार यादी
- बाबुराव वाडकर हणबरवाडी
- महेश शेळके वळीवडे
- अण्णाप्पा कोळी चिंचवाड
- मानसी मांडरेकर चिंचवाड
- सचिन कांबळे वसगडे
- निशिकांत कांबळे वसगडे
- शामराव कोळी वसगडे
- सागर गजबर सरनोबतवाडी
- दयानंद जाधव नेर्ली
- अशोक देवकुळे गांधीनगर
गुलालाची उधळण आणि फटाक्यांची आतिषबाजी!
विजयी उमेदवारांनी अजिंक्यतारा कार्यालयात भेट दिली. यावेळी कोल्हापूर दक्षिण ग्रामीणचे संपर्कप्रमुख बजरंग रणदिवे यांनी आमदार सतेज पाटील आणि माजी आमदार ऋतुराज पाटील यांच्या वतीने सर्व विजयी उमेदवारांचा जंगी सत्कार केला.