ब्रेकिंग न्यूज: कोल्हापुरात 'सतेज चषक'चा थरार
कोल्हापुरात चार एप्रिल पासून रंगणार 'सतेज चषक' फुटबॉल स्पर्धा;
स्थानिक खेळाडूंना व्यासपीठ, बक्षीसांची लयलूट, आणि शहरात फुटबॉलमय वातावरण
कोल्हापूर - कोल्हापूरच्या क्रीडा संस्कृतीचा कणा असलेल्या फुटबॉल खेळाला नवी झळाळी देण्यासाठी पाटाकडील तालीम मंडळ आणि डॉ. डी. वाय. पाटील ग्रुप यांच्या संयुक्त विद्यमाने 'सतेज चषक २०२६' या जिल्हास्तरीय वरिष्ठ गट पुरुष फुटबॉल स्पर्धेचे बिगुल वाजले आहे. कै. पांडबा जाधव व कै. रावसाहेब सरनाईक यांच्या स्मरणार्थ आयोजित ही भव्य स्पर्धा, ४ एप्रिलपासून ऐतिहासिक छत्रपती शाहू स्टेडियमवर रंगणार असून १५ एप्रिलपर्यंत फुटबॉल शौकीनांना सामन्यांची मेजवानी मिळणार आहे.
या स्पर्धेच्या नियोजनाबाबत आयोजित पत्रकार परिषदेत पाटाकडील तालीम मंडळाचे अध्यक्ष राजेंद्र मनोहर ठोंबरे आणि कार्याध्यक्ष संदीप सुभाष सरनाईक यांनी सविस्तर माहिती दिली. कोल्हापूर स्पोर्ट्स असोसिएशनच्या (KSA) मान्यतेने होणाऱ्या या स्पर्धेत कोल्हापूर सॉकर रेफ्री असोसिएशनचे अनुभवी पंच काम पाहणार आहेत. स्थानिक खेळाडूंना हक्काचे व्यासपीठ मिळवून देणे आणि त्यांच्यातील कौशल्याला वाव देणे हा या स्पर्धेचा मुख्य उद्देश असल्याचे आयोजकांनी सांगितले.
खेळाडूंच्या वैयक्तिक कामगिरीला प्रोत्साहन देण्यासाठी उत्कृष्ट गोलकिपर, बचावपटू, मध्यफळीतील खेळाडू आणि आघाडी फळीतील खेळाडूंना प्रत्येकी १५,००० रुपयांची आकर्षक भेटवस्तू दिली जाणार आहे. तसेच प्रत्येक सामन्यात 'मॅन ऑफ द मॅच'चा किताब दिला जाईल, तर संपूर्ण स्पर्धेत चमकदार कामगिरी करणाऱ्या खेळाडूसाठी 'मॅन ऑफ द सिरीज' म्हणून एक विशेष सरप्राईज भेटवस्तू असणार आहे.
स्पर्धेचे वातावरण निर्मितीसाठी शहराच्या विविध मोक्याच्या ठिकाणी खेळाडूंच्या प्रतिमा असलेले १५x२० फुटांचे भव्य बॅनर लावण्यात आले आहेत. छत्रपती शाहू स्टेडियमच्या मुख्य प्रवेशद्वारावर खेळाडूंच्या पोस्टरने सजवलेल्या दोन मोठ्या कमानी उभारण्यात येणार असून संपूर्ण परिसर फुटबॉलमय करण्यात आला आहे. स्पर्धेच्या काळात राजकीय क्षेत्रातील दिग्गज, आमदार, खासदार आणि महाविकास आघाडीचे प्रमुख नेते उपस्थित राहून खेळाडूंचा उत्साह वाढवणार आहेत.
पत्रकार परिषदेला फुटबॉल विभागाचे अध्यक्ष शरद माळी, फुटबॉल कार्याध्यक्ष संपत जाधव, निवास जाधव, बाळासाहेब निचिते, बाळासाहेब चौगुले, दिपक चौरगे, गणेश विचारे, कमलेश शिंदे, तुषार देसाई, सिध्देश हवळ, तुषार घोरपडे आणि विवेक दळवी यांच्यासह मंडळाचे पदाधिकारी व कार्यकर्ते उपस्थित होते. कोल्हापुरातील तमाम फुटबॉलप्रेमींनी या स्पर्धेचा आनंद घेण्यासाठी उपस्थित राहावे, असे आवाहन पाटाकडील तालीम मंडळाचे वतीने करण्यात आले आहे.