कोल्हापुरात २१ वा 'शिव महोत्सव' उत्साहात संपन्न; डॉ. संजय डी. पाटील यांना 'शिवगौरव' पुरस्कार प्रदान
शिवाजी विद्यापीठ आजी-माजी विद्यार्थी स्नेहमेळावा कृती समितीच्या वतीने आयोजित २१ व्या वर्षाचा 'शिव महोत्सव २०२६' राजमाता जिजाऊसाहेब सभागृहात मोठ्या थाटात संपन्न झाला. या सोहळ्यात सामाजिक प्रबोधन, पुरस्कार वितरण आणि महाराष्ट्राच्या लोककलेचा अविष्कार पाहायला मिळाला. डी. वाय. पाटील शिक्षण समूहाचे अध्यक्ष डॉ. संजय डी. पाटील यांना खासदार शाहू छत्रपती यांच्या हस्ते 'शिवगौरव' पुरस्काराने, तर नगरसेवक भरत लाटकर यांना 'शिवसेवा' पुरस्काराने सन्मानित करण्यात आले. यासह शैक्षणिक क्षेत्रातील उल्लेखनीय कामगिरीबद्दल अन्य २० मान्यवरांचाही गौरव करण्यात आला.
याप्रसंगी मार्गदर्शन करताना अंधश्रद्धा निर्मूलन समितीच्या राज्य अध्यक्षा सरोज पाटील यांनी तरुणांना भोंदूगिरी आणि अंधश्रद्धेपासून दूर राहून समाजकार्यात योगदान देण्याचे आवाहन केले. नगरसेवक भरत लाटकर यांनीही राष्ट्रसेवेसाठी युवकांनी वेळ देण्याचे महत्त्व अधोरेखित केले. कार्यक्रमात 'सार्थक क्रिएशन्स' प्रस्तुत 'लोककलेचा जागर' आणि डी. आर. माने कॉलेज ग्रुपच्या वतीने सादर करण्यात आलेल्या 'देवीचा जागर' या कलाविष्काराने उपस्थितांची मने जिंकली. प्रसिद्ध गायक आनंद शिंदे, उत्कर्ष शिंदे आणि अबोली गिऱ्हे यांच्या पहाडी आवाजातील गाण्यांमुळे कार्यक्रमाची रंगत अधिकच वाढली.
निवासी उपजिल्हाधिकारी गजानन गुरव, परीक्षा व मूल्यमापन मंडळाचे संचालक डॉ. अजितसिंह जाधव, समाज कल्याण विभागाचे सहाय्यक आयुक्त सचिन साळे, नगरसेवक आदिल फरास, स्वामी विवेकानंद शिक्षण संस्थेचे मुख्य कार्यकारी अधिकारी कौस्तुभ गावडे, प्रा. रघुनाथ ढमकले, पर्यटन विभागाचे उपसचिव विजय पोवार, डॉ. सरदार जाधव, डॉ. प्रवीण कोडोलीकर, योगिता कोडोलीकर, विश्वजित वाडकर, नितेश गणेशाचार्य, अक्षय मोरे आणि डॉ. कपिल राजहंस.
कृती समितीचे अध्यक्ष मंजीत माने यांनी मनोगत व्यक्त केले, तर उपाध्यक्ष शुभम शिरहट्टी यांनी स्वागत आणि सागर बगाडे यांनी प्रास्ताविक केले.