कोल्हापूर: कोल्हापूर जिल्हा परिषदेच्या अध्यक्ष आणि उपाध्यक्षपदासाठी आज झालेली निवडणूक अपेक्षेप्रमाणे बिनविरोध पार पडली. राष्ट्रवादी काँग्रेस (अजित पवार गट) च्या शिल्पा शशिकांत खोत यांची अध्यक्षपदी, तर भाजपचे तानाजी पाटील यांची उपाध्यक्षपदी निवड झाली आहे.
सतेज पाटील यांच्या नेतृत्वाखालील महाविकास आघाडीने ऐनवेळी उमेदवार न देण्याचा निर्णय घेतल्याने ही प्रक्रिया बिनविरोध झाली. जिल्ह्याचे पालकमंत्री हसन मुश्रीफ आणि खासदार धनंजय महाडिक यांच्या राजकीय रणनीतीचा हा मोठा विजय मानला जात आहे. या निवडीनंतर जिल्हा परिषद परिसरात कार्यकर्त्यांनी गुलालाची उधळण करत जल्लोष केला. ग्रामीण विकासाला गती देणे हे आपले मुख्य ध्येय असल्याचे नवनिर्वाचित अध्यक्ष शिल्पा खोत यांनी माध्यमांशी बोलताना सांगितले.