कोल्हापूर : शहरातील राजारामपुरी परिसरात बुधवारी रात्री (दि. २७) गणेश आगमन मिरवणुकीत नाचताना तरुणांमध्ये वाद झाला आणि त्याचे रूपांतर थेट चाकूहल्ल्यात झाले. या हल्ल्यात वाजिंदर जमादार (रा. सायबर चौक, कोल्हापूर) हा तरुण गंभीर जखमी झाला असून त्याच्यावर खासगी रुग्णालयात उपचार सुरू आहेत.
संध्याकाळी मिरवणूक चौथ्या गल्लीत पोहोचली असताना काही तरुणांमध्ये नाचाच्या मुद्द्यावरून चकमक झाली. सुरुवातीला सुरू झालेला हा वाद चिघळत गेला आणि जमादार याच्यावर धारदार हत्याराने वार करण्यात आला. हल्ल्यानंतर परिसरात एकच गोंधळ उडाला. उपस्थितांनी जखमीला तातडीने रुग्णालयात हलवले.
या घटनेचा संपूर्ण प्रकार जवळच्या दुकानाच्या सीसीटीव्ही कॅमेऱ्यात स्पष्टपणे कैद झाला आहे. पोलिसांनी ते फुटेज जप्त करून हल्लेखोरांचा शोध सुरू केला आहे. शहर उपअधीक्षक प्रिया पाटील यांनी पोलिसांना तातडीने घटनास्थळी पोहोचून आरोपींना पकडण्याचे आदेश दिले आहेत.
सध्या पोलिसांनी काही संशयितांची ओळख पटवली असून त्यांना अटक करण्यासाठी पथक रवाना करण्यात आले आहे. नाचाच्या किरकोळ वादातून एवढ्या मोठ्या स्वरूपाचा प्रकार घडल्याने नागरिकांमध्ये तीव्र संताप व्यक्त होत आहे.