कोल्हापूर :
विघ्नहर्त्याचं आगमन होताच कोल्हापूरकरांचा उत्साह उफाळून आला आहे. बुधवारी सकाळपासूनच शहरात “गणपती बाप्पा मोरया, मंगलमुर्ती मोरया” च्या गजराने वातावरण भारलं. शाहुपुरी, कुंभार गल्ली, बापट कॅम्प, पापाची तिकटी परिसरात चिरमुरे उधळत, फुलांचा वर्षाव करत भाविकांनी आपल्या लाडक्या बाप्पाचं स्वागत केलं.
घराघरात पारंपरिक वाद्यांच्या तालावर गणेशमूर्ती घरी आणण्यात आल्या. ढोल-ताशांच्या गजरात सजवलेल्या मंडपात आणि आरासीत गणराय विराजमान झाला. प्रत्येक गल्लीत विद्युत रोषणाई, रंगीबेरंगी सजावट आणि भक्तिरसाचं वातावरण दिसत आहे.
सार्वजनिक मंडळांच्याही मंडपांत गणेशमूर्तींची प्रतिष्ठापना सुरू असून आकर्षक सजावटीसाठी नागरिकांची गर्दी उसळली आहे. आधल्या दिवसापासूनच मिरवणुकांनी शहर दणाणलं होतं. पारंपरिक पोशाखात, झांज-पथक, लेझीम आणि वाद्यांच्या तालावर तरुणाई रंगली.
बाजारपेठांमध्ये सकाळपासूनच गजबज दिसली. फुलं, सजावटीसाठी साहित्य, दिवे, आरास यांची विक्री मोठ्या प्रमाणात झाली. प्रत्येक घरात आणि मंडळात बाप्पाच्या स्वागताची लगबग सुरू आहे.गणेशोत्सवाच्या आगमनानं कोल्हापूरचं वातावरण भक्तिरस, आनंद आणि मंगलमयतेनं उजळून निघालं आहे.