आर.के. नगर–मोरेवाडी नवीन रस्त्यावर स्ट्रीट लाईट बसविण्याची मागणी
आर.के. नगर चौक ते मोरेवाडी दरम्यानच्या नवीन रस्त्यावर रात्रीच्या वेळी पूर्णपणे अंधार राहत असल्याने नागरिकांच्या सुरक्षिततेचा प्रश्न निर्माण झाला आहे. या मार्गावर दररोज हजारो नागरिक, विद्यार्थी व कामगारांची ये-जा सुरू असते. मात्र रस्त्यावर पुरेसा प्रकाश नसल्यामुळे वाहनचालक तसेच पादचाऱ्यांना अडचणींचा सामना करावा लागत आहे. अंधारामुळे अपघातांची शक्यता वाढण्याबरोबरच नागरिकांच्या सुरक्षेलाही धोका निर्माण झाला आहे.
या पार्श्वभूमीवर जिल्हा परिषद सदस्य संग्राम गोपाळ पाटील यांनी सार्वजनिक बांधकाम विभागाकडे निवेदन देत आर.के. नगर चौक ते मोरेवाडी या नवीन रस्त्यावर मध्यभागी असलेल्या दुभाजकावर तातडीने स्ट्रीट लाईट बसविण्याची मागणी केली आहे. रात्रीच्या वेळी नागरिकांना सुरक्षितपणे प्रवास करता यावा आणि संभाव्य अपघात टाळता यावेत, यासाठी संबंधित विभागाने या मागणीची तातडीने दखल घेऊन आवश्यक कार्यवाही करावी, अशी विनंती पाटील यांनी निवेदनाद्वारे केली आहे.