अखिल भारतीय मराठी चित्रपट महामंडळाच्या अध्यक्षपदी मेघराज राजेभोसले; धनाजी यमकर उपाध्यक्ष
अखिल भारतीय मराठी चित्रपट महामंडळाच्या २०२६ ते २०३१ या पंचवार्षिक कालावधीसाठी झालेल्या निवडणुकीत मेघराज राजेभोसले यांची अध्यक्षपदी तर धनाजी यमकर यांची उपाध्यक्षपदी बिनविरोध निवड झाली. या निवडीमुळे मराठी चित्रपटसृष्टीच्या नेतृत्वाची धुरा पुन्हा एकदा अनुभवी नेतृत्वाकडे सोपविण्यात आली आहे.
महामंडळाच्या १७ सदस्यीय कार्यकारिणीमध्ये मेघराज राजेभोसले यांच्या नेतृत्वाखालील समर्थ पॅनेलने वर्चस्व राखत १६ जागांवर विजय मिळविला. त्यामुळे महामंडळाच्या कारभारात त्यांच्या गटाचे स्पष्ट वर्चस्व निर्माण झाले आहे.
सोमवारी कोल्हापुरात पार पडलेल्या संचालक मंडळाच्या बैठकीत नूतन पदाधिकाऱ्यांची निवड करण्यात आली. निवडणूक निर्णय अधिकारी रागिणी खडके यांच्या अध्यक्षतेखाली झालेल्या या प्रक्रियेत अध्यक्षपदासाठी मेघराज राजेभोसले आणि उपाध्यक्षपदासाठी धनाजी यमकर यांचे एकमेव अर्ज दाखल झाल्याने दोघांचीही बिनविरोध निवड जाहीर करण्यात आली.
विशेष म्हणजे, मेघराज राजेभोसले आणि धनाजी यमकर यांची सलग दुसऱ्यांदा अनुक्रमे अध्यक्ष आणि उपाध्यक्षपदी निवड झाली आहे. त्यामुळे महामंडळाच्या कारभारात सातत्य राहणार असून आगामी काळात मराठी चित्रपटसृष्टीच्या विकासासाठी नवे उपक्रम राबविले जातील, अशी अपेक्षा व्यक्त होत आहे.
निवडीनंतर प्रसारमाध्यमांशी संवाद साधताना अध्यक्ष मेघराज राजेभोसले यांनी महामंडळाच्या भावी योजनांची माहिती दिली. २३ जून रोजी पुण्यात होणाऱ्या पहिल्या बैठकीत सभासद वर्गीकरण, ज्येष्ठ कलावंतांचे मानधन, कर्मचाऱ्यांच्या पेन्शनसह विविध महत्त्वाच्या विषयांवर निर्णय घेतले जाणार असल्याचे त्यांनी सांगितले.
तसेच पहिले मराठी चित्रपट संमेलन आयोजित करण्याच्या दृष्टीनेही महामंडळ प्रयत्नशील असून त्यासंदर्भातील अंतिम निर्णय आगामी बैठकीत होण्याची शक्यता आहे. याशिवाय ज्येष्ठ कलावंतांसाठी वृद्धाश्रम उभारण्याच्या प्रस्तावावरही चर्चा होणार असल्याचे त्यांनी स्पष्ट केले.
मराठी चित्रपटसृष्टीसमोरील विविध आव्हानांना सामोरे जात नव्या संधी निर्माण करण्याची जबाबदारी आता नव्या नेतृत्वावर असणार आहे. त्यामुळे महामंडळाच्या नव्या कार्यकारिणीकडून मराठी चित्रपटसृष्टीला नवसंजीवनी मिळेल, अशी अपेक्षा व्यक्त होत आहे.
अध्यक्ष
मेघराज राजेभोसले
उपाध्यक्ष
धनाजी यमकर
कार्यकारिणी
१७ सदस्य