कोल्हापूर : सोशल मीडियावर प्रसारित झालेल्या कथित व्हिडिओप्रकरणी नगरसेवक ऋतुराज क्षीरसागर यांनी पत्रकार निवेदनाद्वारे आपली भूमिका स्पष्ट करत हा व्हिडिओ एडिट करून प्रसारित करण्यात आल्याचा आरोप केला आहे. या प्रकरणात आपली बदनामी करण्यात आल्याचे सांगत संबंधितांविरोधात ५ कोटी रुपयांच्या अब्रुनुकसानीचा दावा दाखल करणार असल्याचे त्यांनी म्हटले आहे.
निवेदनात रवि इंगवले यांच्यावर गंभीर आरोप करत त्यांनी ब्लॅकमेलिंग आणि खंडणी मागण्याचे प्रकार केल्याचा दावा केला आहे. सोशल मीडियावर प्रसारित करण्यात आलेल्या ऑडिओ-व्हिडिओ क्लिपमधील अपशब्दांद्वारे आपली प्रतिमा मलिन करण्याचा प्रयत्न झाल्याचेही त्यांनी नमूद केले. या प्रकरणामागे काही राजकीय शक्तींचा हात असल्याचा संशय व्यक्त करत, विशेषतः आमदार सतेज उर्फ बंटी पाटील यांच्याकडे बोट दाखविण्यात आले आहे.
नगरसेवक ऋतुराज क्षीरसागर यांनी म्हटले आहे की, संबंधित व्हिडिओचा आमदार राजेश क्षीरसागर यांच्याशी कोणताही संबंध नसल्याचा दावा करण्यात आला आहे. तसेच, व्हिडिओ तयार करणाऱ्या व्यक्तीनेही आपली भूमिका जाहीर केल्याचे त्यांनी सांगितले. निवडणुकीच्या काळात हा व्हिडिओ मुद्दाम व्हायरल करण्यात आल्याचा आरोप करत, कोल्हापूर शहरातील मतदारांनी महायुतीवर विश्वास दाखवत आमदार राजेश क्षीरसागर यांना पाठिंबा दिल्याबद्दल त्यांनी नागरिकांचे आभार मानले.
दरम्यान, आमदार राजेश क्षीरसागर हे सध्या विधिमंडळ अधिवेशनानिमित्त मुंबई येथे असून, या प्रकरणासंदर्भात ते २८ जून रोजी पत्रकार परिषद घेऊन आपली भूमिका जाहीर करणार असल्याची माहिती निवेदनात देण्यात आली आहे.
