दारूच्या नशेत रोज घरात शिवीगाळ करणाऱ्या मुलाच्या जाचाला कंटाळून पित्यानेच पोटच्या मुलाचा चाकूने भोसकून खून केल्याची खळबळजनक घटना कोल्हापूरमधील विक्रमनगर परिसरात घडली आहे. जुनेद गफूर पठाण (वय २०) असे मृताचे नाव असून, याप्रकरणी राजारामपुरी पोलिसांनी संशयित पिता गफूर सुलतान पठाण (वय ४०, रा. स्वामी समर्थनगर) याला अटक केली आहे.
नेमकी घटना काय?
मिळालेल्या माहितीनुसार, विक्रमनगर येथील स्वामी समर्थ कॉलनी परिसरात गफूर पठाण हे आपल्या पत्नी, दोन मुले आणि वृद्ध आईसह राहतात. गफूर पठाण हे चिकनच्या दुकानात कामाला जातात, तर त्यांचा मुलगा जुनेद हा भंगाराच्या दुकानात काम करत होता. जुनेदला दारूचे व्यसन होते. तो दररोज दारू पिऊन घरी यायचा आणि घरातील व्यक्तींना विनाकारण शिवीगाळ करून भांडण उकरून काढायचा. त्याच्या या सततच्या त्रासामुळे संपूर्ण कुटुंब हतबल झाले होते.
अपघाताचा बनाव रचला, पण...
जुनेद रक्ताच्या थारोळ्यात पडल्यानंतर वडिलांनीच त्याला रिक्षातून उपचारासाठी सीपीआर (CPR) रुग्णालयात दाखल केले. यावेळी पोलिसांनी विचारणा केली असता, जुनेद मिरवणुकीत गेला होता आणि तिथे तो जखमी झाल्याची खोटी माहिती वडिलांनी दिली. मात्र, मंगळवारी मध्यरात्री दीडच्या सुमारास उपचारादरम्यान जुनेदचा मृत्यू झाला.
पोलिसी खाक्या दाखवताच दिली कबुली
जुनेदच्या छातीवर झालेली जखम ही कोणत्याही अपघातातील नसून ती धारदार शस्त्राने झालेली असल्याचे डॉक्टरांच्या तपासणीत स्पष्ट झाले. राजारामपुरी पोलीस ठाण्याचे निरीक्षक सतीश होडगर आणि सहाय्यक निरीक्षक रणजित पाटील यांनी कुटुंबीयांकडे कसून चौकशी सुरू केली. वडिलांच्या जबाबात वारंवार विसंगती येत असल्याने पोलिसांनी खाक्या दाखवताच, गफूर पठाण यांनी मुलाच्या त्रासाला कंटाळून आपणच त्याला चाकूने भोसकल्याची कबुली दिली.
या घटनेमुळे विक्रमनगर परिसरात मोठी खळबळ उडाली असून, जन्मदात्या वडिलांनीच मुलाचा काटा काढल्याने हळहळ व्यक्त केली जात आहे. पोलीस या प्रकरणाचा अधिक तपास करत आहेत.