नगरसेविका मानसी लोळगे यांच्या पाठपुराव्याला यश; हॉकी स्टेडियम ते कळंबा जेल मार्गावर गतीरोधक बसवणार
हॉकी स्टेडियम चौक ते कळंबा जेल या नूतनीकरण झालेल्या मार्गावर वेगाने धावणाऱ्या वाहनांमुळे निर्माण झालेला अपघाताचा धोका लक्षात घेऊन, येथे गतीरोधक बसवण्यासाठी नगरसेविका अॅड. मानसी सतीश लोळगे यांनी केलेल्या मागणीला यश आले आहे. शहर वाहतूक नियंत्रण शाखेने या प्रस्तावाला हिरवा कंदील दाखवला असून, महानगरपालिकेला तातडीने कार्यवाही करण्याच्या सूचना दिल्या आहेत.
या मागणीची दखल घेत शहर वाहतूक नियंत्रण शाखेचे पोलीस निरीक्षक नंदकुमार मोरे यांनी सकारात्मक अभिप्राय दिला आहे. या मार्गावरील खालील महत्त्वाच्या ठिकाणी गतीरोधक किंवा रंबलर्स बसवणे लोकांच्या सुरक्षिततेसाठी अत्यंत आवश्यक असल्याचे वाहतूक पोलिसांनी आपल्या पत्रात नमूद केले आहे:
- बालाजी पार्क
- शाहू कॉलनी चौक
- रामानंद पूल
- निर्मिती चौक
- आनंद प्राईड अपार्टमेंट
वाहतूक पोलिसांनी दिलेल्या या संमतीमुळे आता या मार्गावरील अपघातांच्या धोक्याला लगाम बसणार आहे. 'भारतीय रस्ते काँग्रेस'च्या (IRC) नियमावलीनुसार महानगरपालिकेने या ठिकाणी तातडीने गतीरोधक उभारावेत, अशा हालचाली आता प्रशासकीय पातळीवर सुरू झाल्या आहेत. नगरसेविका मानसी लोळगे यांनी केलेल्या या विशेष पाठपुराव्याबद्दल परिसरातील नागरिकांमधून समाधान व्यक्त होत आहे.
