कोल्हापूर: प्रतिनिधी
कोल्हापूर येथील मध्यवर्ती बसस्थानक परिसरात रिक्षा भाड्याच्या कारणावरून एका महिलेने रिक्षाचालकाला भररस्त्यात चांगलेच धारेवर धरल्याची घटना घडली आहे. या वादाचा व्हिडिओ सोशल मीडियावर प्रचंड व्हायरल झाला असून, शहरात हा चर्चेचा विषय ठरला आहे.
मिळालेल्या माहितीनुसार, मध्यवर्ती बसस्थानकाबाहेर संबंधित महिला आणि एका रिक्षाचालकामध्ये भाड्याच्या रकमेवरून शाब्दिक चकमक उडाली. रिक्षाचालकाने जादा भाडे मागितल्याचा आरोप करत महिलेने संताप व्यक्त केला. यावेळी दोन्ही बाजूंनी जोरदार वाद झाला, ज्यामुळे परिसरातील प्रवाशांचे आणि नागरिकांचे लक्ष वेधले गेले.
बसस्थानक परिसरात रिक्षाचालकांकडून प्रवाशांची अडवणूक होण्याच्या तक्रारी वारंवार येत असतात. त्यातच आता या 'हायव्होल्टेज' ड्राम्याचा व्हिडिओ समोर आल्याने रिक्षा भाड्याच्या प्रश्नावर पुन्हा एकदा चर्चा सुरू झाली आहे. या प्रकरणी अधिकृत तक्रार झाली नसली, तरी सोशल मीडियावर मात्र प्रवाशांच्या सुरक्षेचा आणि रिक्षा भाड्याच्या मनमानीचा मुद्दा ऐरणीवर आला आहे.
