कोल्हापुरात निसर्गाचा दुर्मिळ आविष्कार; मानवी वस्तीजवळ आढळल्या 'पांढऱ्या' शुभ्र खारुताई
कोल्हापूर: निसर्गाच्या विविधतेने नटलेल्या कोल्हापूर शहरात एक अत्यंत दुर्मिळ घटना समोर आली आहे. शहरातील मानवी वस्तीजवळ चक्क पांढऱ्या रंगाच्या खारुताईंचे दर्शन झाले असून, या घटनेने वन्यजीव प्रेमी आणि अभ्यासकांमध्ये मोठे कुतूहल निर्माण केले आहे. ल्यूसीझम या दुर्मिळ अनुवंशिक स्थितीमुळे या खारींचा रंग पांढरा झाला असल्याचे समोर आले आहे.
पक्षीनिरीक्षणातून लागला शोध
नेहमीप्रमाणे पक्षीनिरीक्षण करत असताना वन्यजीव अभ्यासक मयुरेश रामपुरे आणि देवेंद्र भोसले यांना एक वेगळ्याच रंगाचा जीव झाडावर दिसला. सुरुवातीला ती एकच पांढरी खार असावी असा त्यांचा समज होता. मात्र, चिकाटीने आणि बारकाईने निरीक्षण केल्यानंतर त्या ठिकाणी एकाच वेळी दोन पांढऱ्या शुभ्र खारुताई असल्याचे स्पष्ट झाले. कोल्हापूर शहरात अशा प्रकारची ही पहिलीच नोंद असल्याचे मानले जात आहे.
काय आहे 'ल्यूसीझम'?
ल्यूसीझम (Leucism) हा एक दुर्मिळ आनुवंशिक विकार आहे. यामध्ये प्राण्यांच्या शरीरावरील रंगद्रव्य (Pigmentation) अंशतः किंवा पूर्णपणे कमी होते, ज्यामुळे त्यांचा रंग पांढरा दिसतो. मात्र, 'अल्बिनिझम'च्या उलट यामध्ये प्राण्यांच्या डोळ्यांचा रंग बदलत नाही, तो सामान्यच राहतो.
जागतिक स्तरावर संशोधनाची तयारी
या दुर्मिळ घटनेचे गांभीर्य ओळखून यावर शास्त्रीय अभ्यास सुरू करण्यात आला आहे. देवेंद्र भोसले, मयुरेश रामपुरे आणि आमदार शशिकांत शिंदे महाविद्यालयातील सहाय्यक प्राध्यापिका कल्पना साबळे यांनी या विषयावर आधारित एक सविस्तर संशोधन निबंध (Research Paper) तयार केला आहे. या शोधामुळे कोल्हापूरच्या जैवविविधतेचे महत्त्व आता जागतिक स्तरावर पोहोचण्यास मदत होणार आहे.
मानवी वस्तीच्या इतक्या जवळ अशा दुर्मिळ जिवांचे अस्तित्व असणे, हे पर्यावरण संतुलनाच्या दृष्टीने महत्त्वाचे मानले जात आहे. सध्या या खारींचे संवर्धन आणि त्यांच्या हालचालींवर अभ्यासकांचे विशेष लक्ष आहे.