कोल्हापूर (प्रतिनिधी):
कोल्हापूर जिल्हा सहकारी दूध उत्पादक संघ (गोकुळ) आपल्या सभासद शेतकऱ्यांच्या प्रगतीसाठी नेहमीच नवनवीन पावले उचलत असतो. याच पार्श्वभूमीवर, नेदरलँड्समधील 'पी.यू.एम.' (PUM) या आंतरराष्ट्रीय स्वयंसेवी संस्थेच्या सहकार्याने गोकुळमधील ४३ पशुवैद्यकीय अधिकार्यांसाठी आयोजित केलेले १० दिवसांचे प्रशिक्षण नुकतेच यशस्वीरित्या पूर्ण झाले आहे.
प्रशिक्षणाचा मुख्य उद्देश
दुग्ध व्यवसाय आणि पशुधन व्यवस्थापन क्षेत्र अधिक सक्षम करण्यासाठी आधुनिक तंत्रज्ञानाचा अवलंब करणे हा या प्रशिक्षणाचा मुख्य उद्देश होता. पहिल्या टप्प्यात "जनावरांची दूध उत्पादकता वाढवणे व गोठा व्यवस्थापन" या विषयावर सखोल मार्गदर्शन करण्यात आले. हे प्रशिक्षण ६ ते १७ मार्च २०२६ या कालावधीत 'स्वर्गीय आनंदराव पाटील-चुयेकर प्रशिक्षण केंद्र', ताराबाई पार्क येथे पार पडले.
आंतरराष्ट्रीय तज्ज्ञांचे मार्गदर्शन
नेदरलँड्सचे अनुभवी पशुवैद्यकीय तज्ज्ञ डॉ. अर्विन द. विथ यांनी प्रशिक्षणादरम्यान मार्गदर्शन केले. प्रशिक्षण पूर्ण झाल्यानंतर गोकुळचे चेअरमन नविद मुश्रीफ यांच्या हस्ते डॉ. विथ यांचा विशेष सत्कार करण्यात आला.
यावेळी चेअरमन मुश्रीफ म्हणाले की, "गोकुळचे पशुवैद्यकीय क्षेत्रातील शिस्तबद्ध कामकाज आणि शेतकऱ्यांशी असलेली बांधिलकी पाहूनच नेदरलँड्समधील पी.यू.एम. संस्थेने गोकुळची निवड केली आहे, ही आमच्यासाठी अभिमानास्पद बाब आहे."
दोन वर्षांचा सामंजस्य करार
गोकुळ संघ आणि पी.यू.एम. संस्था (नेदरलँड्स) यांच्यात १८ डिसेंबर २०२५ ते १८ डिसेंबर २०२७ या दोन वर्षांच्या कालावधीसाठी 'सहकार्य करार' (Framework Agreement) करण्यात आला आहे. या करारानुसार:
दर दोन महिन्यांनी विविध विषयांतील आंतरराष्ट्रीय तज्ज्ञ गोकुळ संघात येऊन मार्गदर्शन करणार आहेत.
आगामी काळात पशुधन व्यवस्थापन, प्रजनन क्षमता सुधारणा, जनावरांचे आरोग्य, खाद्य व चारा व्यवस्थापन, तसेच विपणन आणि धोरणात्मक नियोजन या विषयांवर मार्गदर्शन मिळणार आहे.
या कार्यक्रमास गोकुळचे ज्येष्ठ संचालक विश्वास पाटील, संचालक अजित नरके, प्रकाश पाटील, कार्यकारी संचालक डॉ. योगेश गोडबोले, व्यवस्थापक (पशुसंवर्धन) डॉ. प्रकाश साळुंखे, डॉ. दयावर्धन कामत, डॉ. प्रकाश दळवी, डॉ. तानाजी कडवेकर, डॉ. सुभाष गोरे, डॉ. रणजीत चोपडे आणि जनसंपर्क अधिकारी सचिन पाटील यांच्यासह अनेक अधिकारी उपस्थित होते.