कोल्हापूर:
जुना बुधवार पेठ सेवाभावी संस्था आणि भगिनी मंच यांच्या वतीने आयोजित राज्यस्तरीय राजेश चषक फुटबॉल स्पर्धेत आज श्री शिवाजी तरुण मंडळाने प्रॅक्टिस फुटबॉल क्लबचा ३-१ असा पराभव करून उपांत्य फेरीत धडक मारली. या चुरशीच्या सामन्यात शिवाजी तरुण मंडळाच्या संकेत साळोखेने शानदार हॅट्रिक नोंदवत स्पर्धेतील पहिली हॅट्रिक करण्याचा मान पटकावला.
सामन्याच्या सुरुवातीपासूनच दोन्ही संघांनी वेगवान खेळाचे प्रदर्शन केले. पूर्वार्धात ६ व्या मिनिटाला हर्ष जरगच्या पासवर संकेत साळोखेने हेडरद्वारे पहिला गोल करून शिवाजी मंडळाला आघाडी मिळवून दिली. त्यानंतर २७ व्या मिनिटाला इंद्रजीत चौगुलेच्या पासवर पुन्हा एकदा संकेतने हेडरद्वारे गोल करत ही आघाडी २-० अशी भक्कम केली. प्रॅक्टिस क्लबनेही जोरदार प्रत्युत्तर देण्याचा प्रयत्न केला. ३१ व्या मिनिटाला केवळ कांबळेच्या पासवर सुजित एस. याने हेडरद्वारे गोल करत पिछाडी २-१ अशी कमी केली.
उत्तरार्धात दोन्ही संघांमध्ये चुरस पाहायला मिळाली. प्रॅक्टिस क्लबच्या खेळाडूंनी जिगरबाज खेळ करत बरोबरीसाठी प्रयत्न केले, मात्र ६६ व्या मिनिटाला संकेत अनिल साळोखेच्या पासवर संकेत नितीन साळोखेने तिसरा गोल नोंदवत आपली हॅट्रिक पूर्ण केली आणि संघाचा विजय निश्चित केला. शिवाजी तरुण मंडळाकडून यश जांभळे, संकेत जरग आणि इंद्रजीत चौगुले यांनी उत्कृष्ट खेळ केला, तर प्रॅक्टिस क्लबकडून अजिंक्य नलवडे, सूरज जाधव, सचिन गायकवाड, साहिल डकरे आणि सुजित एस. यांची कामगिरी उल्लेखनीय राहिली. उत्कृष्ट खेळाचे प्रदर्शन करणाऱ्या संकेत नितीन साळोखेला 'सामनावीर' म्हणून गौरविण्यात आले.