कोल्हापूर: पुढील महापालिका निवडणुकांकडे संपूर्ण राज्याचे लक्ष लागले असताना, आरक्षण सोडतीच्या तारखा अखेर निश्चित झाल्या आहेत. राज्य निवडणूक आयोगाकडून या प्रक्रियेचा अधिकृत कार्यक्रम जाहीर करण्यात आला असून 11 नोव्हेंबर 2025 रोजी आरक्षण सोडत पार पडणार आहे.
राज्य निवडणूक आयोगाचे सचिव सुरेश कांकाणी यांनी संबंधित आदेश प्रसिद्ध केले आहेत. सोडतीच्या दिवशीच संबंधित अहवाल आयोगाकडे सादर करण्याची जबाबदारी प्रशासनावर असणार आहे. 30 ऑक्टोबर ते 4 नोव्हेंबर 2025 या कालावधीत जागावाटपाची संख्या निश्चित करून ती आयोगाकडे सादर करण्याची सूचना प्रशासनाला करण्यात आली आहे.
तसेच, आरक्षणाबाबत हरकती आणि सूचना यासाठी निश्चित केलेली 24 नोव्हेंबर ही शेवटची तारीख असेल. सर्व प्रक्रिया पूर्ण झाल्यानंतर अंतिम मान्यता मिळालेली आरक्षण यादी राज्य सरकारच्या राजपत्रातून 2 डिसेंबर 2025 रोजी जाहीर करण्यात येणार आहे.
कोल्हापूर महानगरपालिकेसाठीही हाच कार्यक्रम लागू राहणार असून एकूण 20 प्रभागांतील 81 नगरसेवक पदांवर निवडणूक होणार आहे. त्यामुळे शहरातील राजकीय वातावरणात या घोषणेमुळे नव्या चर्चांना उधाण आले आहे.