कोल्हापूर (प्रतिनिधी):
येथील नामांकित 'केआयटी' (KIT) कॉलेजमधील सिव्हिल एनवायरमेंट विभागाचे विभागप्रमुख (HOD) सौरभ जोशी यांच्यावर विद्यार्थिनींशी अश्लील वर्तन केल्याप्रकरणी गोकुळ शिरगाव पोलीस ठाण्यात गुन्हा दाखल करण्यात आला आहे. एका विद्यार्थिनीला केबिनमध्ये बोलावून तिच्याशी गैरवर्तन केल्याचा गंभीर आरोप त्यांच्यावर ठेवण्यात आला आहे.
मिळालेल्या माहितीनुसार, संबंधित प्राध्यापकाने एका विद्यार्थिनीला वैयक्तिक कामासाठी केबिनमध्ये बोलावले होते. यावेळी त्यांनी तिच्याशी अश्लील आणि अनुचित वर्तन केले. या धक्क्यातून सावरल्यानंतर पीडित विद्यार्थिनीने हिंमत दाखवत ही बाब उघड केली. तपासादरम्यान समोर आलेल्या प्राथमिक माहितीनुसार, संबंधित प्राध्यापकाने आतापर्यंत ४ ते ५ विद्यार्थिनींशी अशाच प्रकारचे वर्तन केल्याचे आरोप करण्यात येत आहेत.
या घटनेमुळे शैक्षणिक क्षेत्रात मोठी खळबळ उडाली असून पालकांमधून संताप व्यक्त केला जात आहे. गोकुळ शिरगाव पोलिसांनी या प्रकरणाची गंभीर दखल घेतली असून प्राध्यापक सौरभ जोशी यांच्यावर विनयभंगाचा गुन्हा दाखल केला आहे. या प्रकरणाचा अधिक सखोल तपास सुरू असून अन्य कोणा विद्यार्थिनीसोबत असा प्रकार घडला आहे का, यादृष्टीनेही पोलीस चौकशी करत आहेत.