कोल्हापूर | प्रतिनिधी
"हर एक फ्रेंड जरुरी होता है..." ही ओळ फक्त एक गाणं नाही, तर लाखो हृदयांमधील भावना व्यक्त करणारा शब्दसंग्रह आहे. नातेसंबंधांच्या या विश्वात, ‘मैत्री’ हे एक असं नातं आहे जे रक्ताचं नसतानाही रक्ताच्या नात्यांपेक्षा अधिक घट्ट, अधिक जवळचं आणि अधिक विश्वासाचं असतं.
आपण अनेक नात्यांमध्ये अडकलेलो असतो – आई-वडील, भाऊ-बहिण, नवरा-बायको, सासू-सून... पण या सर्व नात्यांच्या चौकटींपलीकडे एक नातं असतं – मैत्रीचं! ही अशीच नाळ आहे, जी कुठल्याही सामाजिक बंधनांशिवाय जोडली जाते. जगात कोणतीही अडचण असो, कोणतीही भावना व्यक्त करायची असो, एखाद्या गोष्टीबद्दल सल्ला हवा असो... आपल्या मनात साचलेलं सगळं आपण आपल्या मित्रांसमोर सहज उघड करतो – कोणत्याही भीतीशिवाय, कोणत्याही संकोचाविना.
मैत्री म्हणजे फक्त एकत्र फिरणं, गप्पा मारणं, सेल्फी काढणं नव्हे – तर गरज पडल्यावर न बोलता समजून घेणं, डोळ्यातलं पाणी हसवून थांबवणं आणि खचलेल्या मनाला आधार देणं. म्हणूनच मैत्रीला आयुष्यातील ‘भावनिक औषध’ असंही म्हणावं लागेल.
२०२५ सालचा फ्रेंडशिप डे येत्या ३ ऑगस्ट रोजी साजरा होतो आहे. जगभरातील कोट्यवधी तरुण या दिवशी आपल्या मित्रांसोबत विविध प्रकारे हा दिवस खास साजरा करतात – कोणीतरी गिफ्ट देऊन, तर कोणी एकत्र फिरून. सोशल मीडियावर देखील या दिवशी #FriendshipDay चा ट्रेंड असतोच.
या दिवशी अनेक ठिकाणी खास कार्यक्रम, मैत्रीगीतांचे सादरीकरण, कविता स्पर्धा, तसेच मित्रांसाठी खास मेन्यू असलेले रेस्टॉरंट्सचे ऑफर्स – अशा अनेक गोष्टी बघायला मिळतात. कॉर्पोरेट ऑफिसपासून ते शाळा-कॉलेजांपर्यंत, प्रत्येक ठिकाणी मैत्रीचा उत्सव साजरा होतो.
मात्र, या सर्व गोष्टींपेक्षा महत्त्वाचं म्हणजे आपल्या मित्राला एक फोन करणं, त्याला आठवण सांगणं, किंवा एक साधा "Thank you for being there" हा मेसेज देखील मैत्रीचं नातं अधिक घट्ट करतो.
आजच्या स्पर्धात्मक आणि धावपळीच्या जीवनात, आपल्याला असं एक नातं लागते – जे कुठल्याही अपेक्षेशिवाय आपल्यावर प्रेम करतं, आपल्याला समजून घेतं आणि आपली चूक समोर ठेऊनही नातं टिकवून ठेवतं. हीच मैत्री आहे.त्यामुळे यंदाचा फ्रेंडशिप डे फक्त फुगे, गिफ्ट्स, इंस्टाग्राम स्टोरीजपुरता मर्यादित न ठेवता, आपल्या जुन्या मित्राला फोन करा, भेटा, किंवा किमान एक स्मितहास्य तरी पाठवा.
कारण खरंच – हर एक फ्रेंड जरुरी होता है…